Brillantes, kompiyansang sayong mahuman ang pag-imprinta sa mga balota nga gamiton sa eleksyon

Ni Alfonso T. Ruda

DIPOLOG CITY, APR. 2(PIA)---Kompiyansa ang Commission on Election(COMELEC) nga mahuman ang pag-imprinta sa kapin sa 52 milyones ka mga balota nga gamiton karong piniliay sa Mayo 13, ugmang adlawa.

Kini ang gipahayag ni Comelec Chairman Sixto Brillantez Jr., human nga gipahibalo sa National Printing Office  nga nahuman na nila ang pag-imprinta sa 50 milyones ka mga balota.

Ang pag-imprinta sa mga balota gisugdan sa NPO niadtong Pebrero 25 ug gitahasan silang humanon kini hangtud sa Abril 25.

Sa laing kalambuan, kompiyansa usab si Brillantes nga ihatag ra sa Dominion Voting System ngadto sa SLI Global Solutions ang source code sa mga Precinct Count Optical Scan (PCOS) machines nga gamiton karong eleksyon.

Matod pa ni Brillantes, miuyon na ang Dominion Voting System nga ihatag ang source Code ngadto sa SLI.

Ang SLI Global Solutions mao ang third party reviewer sa Comelec.

Ang source code mao ang instruksyon nga mabasa sa tawo nga magtug-an kon unsa ang buhaton sa computer equipment panahon sa eleksyon.(ATR/PIA9-Zambo Norte)