Palasyo, nangayong dili ilakip sa appointment ban ang pagtudlo ug Commissioners sa Cmelec

Ni Alfonso T. Ruda

DIPOLOG CITY, APR. 2(PIA)---Gipangayo karon sa Malakanyang ngadto sa Commission on Election nga dili ilakip sa appointment ban panahon sa election period ang pagtudlo ug Commissioners sa Comelec gumikan sa kamahinungdanon niini sa taliabot nga eleksyon.

Matod pa ni Deputy Presidential spokesperson Abigail Valte, kompiyansa ang palasyo nga positibo ang mahimong tubag sa sulat nga gipadala sa Malakanyang ngadto sa Comelec kabahin niini, di pa lang dugay.

Sayo niini, tagsa-tagsang namalibad sila si kanhi Lanao del Norte Rep. Makabangkit Lanto ug Atty. Bernadette Sardillo nga mahimong commissioners sa komisyon.

Delicadeza ang rason ni Lanto sa pagbalibad sa iyang appointment human nga nalambigit siya sa kontrobersya niadtong nakalabay nga eleksyon.

Si Sardillo sa laing bahin, nagkanayon usab nga gikumbinsi siya sa iyang pamilya nga balibaran ang pagtudlo kaniya sa maong posisyon.(ATR/PIA9-Zamboanga del Norte)