Transition Commission magtagbo karong Miyerkules

Ni Alfonso T. Ruda

DIPOLOG CITY, APR. 1(PIA)--- Sa labing unang higayon, magtagbo karong Miyerkules ( Abril 3) ang mga miembro sa Transition Commission aron magpanday sa Bangsamoro Basic Law nga mosalamin sa damgo sa gobyerno ug sa tanang dunay kalambigitan niini.

Matod pa ni Presidential spokesperson Edwin Lacierda, pormal nga ipaila sa peace panel sa gobyerno ug Moro Islamic Liberation Front (MILF) ngadto sa publiko ang mga miembro sa Transition Commission karong sunod adlaw.

Ang Transcom natawo pinaagi sa Orden Ehikutibo numero 120 nga giisyo ni Presidente Aquino aron magpanday sa Bangsamoro Basic Law nga magmugna sa bag-ong political entity nga tawgon “Bangsamoro.”

Kini maoy mopuli sa 23-anyos nang Autonomous Region in Muslim Mindanao nga magpahigayon sa ilang katapusang eleksyon karong Mayo 13.

Gumikan niining maong kalambuan, mapamubo na lamang ang termino sa mga opisyales sa rehiyon nga mapili karong umaabot karong umaabot nga eleksyon sa Mayo 13, 2013.(ATR/PIA9-Zambo Norte)

Nakalapas sa Comelec gun ban miabot na sa 2,032 ka tawo

Ni Alfonso T. Ruda

DIPOLOG CITY, APR. 1(PIA)--- Miabot na sa 2,032 ka tawo ang nahulog sa mga kamot sa Philippine National Police (PNP) gumikan sa paglapas sa nagpadayong implementasyon sa Comelec gun ban hangtud niadtong adlaw nga Biyernes, Marso 29.

Sumala pa sa tigpamaba sa Philippine National police nga si Chief Supt. Generoso Cerbo Jr., ang mga nadakpan gilangkuban sa 1,860 ka mga sibilyan, 102 ka mga security guards, 28 ka mga opisyal sa gobyerno, 24 ka pulis, 13 ka sundalo, 3 ka mga Cafgu ug tagsa gikan sa Bureau of Fire Protection (BFP) ug Bureau of Jail Management and Penology(BJMP).

Matod pa ni Cerbo, sukad nga gipatuman ang Comelec Resolution no. 9561-A hangtud sa Marso 29, nakakompislar na ang kapulisan ug 1,857 ka nagkalain-laing kalibre sa armas, 582 ka mga mahait nga hinagiban, 105 ka mga granada, 109 ka mga pusil-pusil ug 299 ka mga explosive devices.

Ang gun ban gipatuman sa Comelec sugod niadtong Enero 13, 2013 aron mamenusan ang mga di-maayong panghitabo o kaha masiguro  nga magmalinawon ang taliabot nga eleksyon.(ATR/PIA9-Zamboanga del Norte)

Puwersa sa AFP ipabilin sa kadagatan sa Basulta

ni Alfonso T. Ruda

DIPOLOG CITY, MAR. 18(PIA)---Ipadayon sa Armadong Kusog sa Pilipinas ang pagbutang ug puwersa Tawi-Tawi aron motabang sa mga Filipinong pamilya nga apektado sa nagpadayong gubat didto Sabah, Malaysia.

Sumala pa sa tigpamaba sa Armadong Kusog sa Pilipinas nga si Col. Arnulfo Burgos Jr., 34 ka mga barko sa Philippine Navy, Lockheed C-130 cargo plane ug duha ka batalyon sa mga sundalo ang kasamtangang naka-deploy karon sa Tawi-Tawi.

Ang nasangpit nga mga asset sa military mao ang gikargahan sa namakwet nga mga pamilya, mga hinabang ug medical supplies.

Sayo niini, nagbutang ang Phil. Navy niadtong bulan sa Prebrero ug napulo (10) ka mga barko isip ang blockade niadtong Pebrero sa kadagatan sa Basilan, Sulu ug Tawi gumikan sa gikatahong pag-adto sa mga armadong kalalakihan sa Lahad Datu, Sabah, Malaysia.(ATR/PIA9-Zamboanga del Norte) 

Mga magbabalaod kompiyansang pirmahan ni Pres. Aquino ang balaodnon alang sa mga PWDs

Ni Alfonso T. Ruda

DIPOLOG CITY, MAR. 18(PIA)---Kompiyansa ang mga magbabalaod nga pirmahan ra sa dili madugay ni Presidente Benigno Aquino III para mahimong hingpit na nga balaod ang balaodnon nga magpalapad sa posisyon alang sa mga tawong dunay kabilinggan sa panglawas.

Ilalom sa maong balaodnon, usa ka porsiento sa tanang posisyon sa mga buhatan, ahensiya ug korporasyon sa gobyerno, ma-casual man, emergency o contractual nga posisyon ang igahin alang sa mga tawong dunay kabilinggan sa panglawas.

Ang House Bill 5475 nga naamendahan sa Senate Bill 3371 naghatag ug patas nga kahigayonan sa panarbaho ngadtp sa mga kwalipikadong individual nga dunay kabilinggan sa panglawas.

Ang maong balaodnon nagdasig usa sa mga pribadong korporasyon nga dunay dili moubos sa 100 ka mga trabahante nga mogahin ug usa ka porsiento alang sa mga tawong dunay kabilinggan sa panglawas. .(ATR/PIA9-Zamboanga del Norte) 

Nakalapas sa election gun ban miabot sa 1,632 ka tawo, sumala pa sa PNP

Ni Alfonso T. Ruda

DIPOLOG CITY,Mar. 18(PIA)---Miabot na sa l,632 ka tawo ang nadakpan sa Philippine National Police gumikan sa paglapas sa gipatumang election gun ban.

Sumala pa sa PNP, ang 1,632 nga nadakpan gilangkuban sa 1,482 ka mga sibilyan, 20 ka mga opisyal sa gobyerno, 94 ka mga security guards, 20 ka mga pulis, 12 ka mga sundalo, ug tagsa gikan sa Bureau of Fire Protection ug Citizens Armed Forces Geographical Units kon CAFGU.

Dugang pa sa PNP, nakuha gikan sa mga nakalapas ang 1,657 ka mga nagkalain-laing kalibre sa armas, 69 ka mga de-bomba ug pusil-pusil, 462 ka mga mahait nga hinagiban, 74 ka granada, 296 ka mga explosives ug 14,831 ka mga bala sa nagkalain-laing kalibre sa armas.

Ang election gun ban gipatuman sa Commission on Election gikan sa Enero 12 hangtud sa Hunyo 12 sa tinguhang mahimong malinawon ug hapsay ang umaabot nga piniliay sa Mayo 13, 2013.(ATR/PIA9-Zamboanga del Norte)